S. Messa da laud
Dumengia, ils 18 da zercladur 2023 allas 18.30 uras
cun sur Pius Betschart da Flem
Cordial invit a nossa messa da laud cun musica nova, moderna e spirituala e cun ina liturgia ed oraziuns per part cumpletadas cun acustica, graficas ni elements visuals.
L’unfrenda va en favur digl agid da fugitivs dalla Caritas.
Nus selegrein sin in bien seveser cun vus.
Mument d’oraziun cun ils curals da cardientscha
Mesjamna, ils 21 zercladur 2023 allas 19.00 uras ella Sentupada
Ils curals da cardientscha – in bratschalet cun 18 curals da differentas grondezias, fuormas e colurs – schi gagls sco nossa veta. Mintga cural ha siu agen num e sia muntada particulara.
Jeu envidel Vus cordialmein da sepusar anavos e sesarver in techet per ruaus e silenzi. Entras meditaziun e reflexiun lein nus encurir ensemen ils curals da nossa veta. Silsuenter gudin nus da cuminonza ina ceremonia da té e caffè tut speciala.
Sin Vossa annunzia selegra: Stefanie Kälin,
telefon: 079 476 98 31 ni e-mail: casa25@kns.ch.
Survetsch divin preeucaristic pils affons
Dumengia, ils 25 da zercladur 2023 allas 10.30 uras ella Sentupada
Tema: La scaffiziun
Duront la messa dalla dumengia ein ils affons dalla scoletta tochen la secunda classa envidai cordialmein al survetsch divin preeucaristic ella Sentupada.
Cars affons, nus selegrein d’astgar beneventar vus en nies miez,
Tamara e Luzi
S. Messa alpestra a Nagens
Dumengia, ils 2 da fenadur 2023 allas 11 uras avon la stalla
Il Chor mischedau Laax conta.
Marenda: L’ustria Stalla a Nagens ei aviarta. Tgi che preferescha da marendar ord igl agen saccados sa far quei sin las meisas sper la fontauna. La groma vegn offerida dils purs.
Viadi: Il bus a Nagens parta allas 9.20 uras ed allas 10.20 uras naven dall’anteriura fermada sper il parcadi dil lag. Il bus da retuorn parta allas 14.05 uras. Quels treis cuors vegnan offeri dalla pleiv.
Nus selegrein da celebrar cun vus il survetsch divin sut tschiel aviert e sperein da passentar ina legreivla dumengia en buna cumpignia.
En cass d’aura malguessa dat la numera da telefon 076 406 41 12 sclariment naven dallas 7.00-9.00 uras. Da maccort’aura ha la messa liug allas 10.30 uras en baselgia parochiala a Laax.
Pelegrinadi dalla pleiv a Maria Bildstein, Benken
Sonda, ils 19 d’uost 2023
Suenter ina liunga pausa selegrein nus da puspei astgar organisar uonn in pelegrinadi per nossas parochianas e nos parochians. Da cuminonza mein nus cul bus tochen a Maria Bildstein, Benken el cantun S. Gagl.
Suenter la guida „Vom Bildstock zur Madonna im Waldgarten” mein nus ensemen a marenda ell’ustria „Bretzelstube” a Benken. Allas 15.00 uras visitein nus il survetsch divin ella baselgia da Maria Bildstein. Il survetsch divin vegn celebraus dad in pader dalla claustra da St. Otmarsberg en concelebraziun cun sur Bronislaw.
Annunzias pil pelegrinadi pren la secretaria dallas pleivs bugen encunter tochen ils 21 da fenadur
per telefon: 076 406 41 12 ni per e-mail: secretariat@pleiv-laax-falera.ch.
Nus selegrein sin stedia participaziun
e sin in bi ed interessant gi en buna cumpignia.