S. Messa da laud
Dumengia, ils 11 d’uost 2024 allas 18.30 uras a Laax
cun sur Sajan Vattakkat da Breil
Cordial invit a nossa messa da laud cun musica nova, moderna e spirituala e cun ina liturgia ed oraziuns per part cumpletadas cun acustica, graficas ni elements visuals.
L’unfrenda va en favur dalla fundaziun „Mbara Ozioma”.
Per passentar ina cuminonza viventa e cartenta ein tuts envidai suenter il survetsch divin tier in refrestg ella Sentupada.
Nus selegrein sin in bien seveser cun vus.
Messa alpestra a Nagens
Dumengia, ils 18 d’uost 2024 allas 11.00 uras avon la stalla
Il Chor mischedau Laax conta.
Nus selegrein da celebrar cun vus il survetsch divin tradiziunal sut tschiel aviert e sperein da passentar ina legreivla dumengia en buna cumpignia.
Marenda: L’ustria Stalla a Nagens ei aviarta. Tgi che preferescha da marendar ord igl agen saccados sa far quei sin las meisas sper la fontauna. La groma vegn offerida dils purs.
Viadi: Il bus a Nagens parta allas 9.20 uras ed allas 10.20 uras naven dall’anteriura fermada sper il parcadi dil lag. Il bus da retuorn parta allas 14.05 uras. Quels treis cuors vegnan offeri dalla pleiv.
En cass d’aura malguessa dat la numera da telefon 076 406 41 12 sclariment naven dallas 7 tochen las 9 uras. Da maccort’aura ha la messa liug allas 10.30 uras en baselgia a Laax.
Mument d’oraziun cun ils curals da cardientscha
Mesjamna, ils 21 d’uost 2024 allas 19.00 uras a Laax ella Sentupada
Maria, ti mumma da tuts – aschia senumna il tema da nies mument d’oraziun cun ils curals da cardientscha.
Mumma – tgei impurtont plaid! Per biars il plaid dils plaids. Tgei muntada ha quei plaid oz per nus? Nus rughein per las mummas digl entir mund; per ils quitaus, las dolurs e la carezia che colligian ellas ina cun l’autra.
Silsuenter gudin nus da cuminonza ina ceremonia da té e caffè tut speciala.
Sin vossa annunzia selegra:
Stefanie Kälin, telefon 079 476 98 31
ni e-mail: casa25@kns.ch.
Concerts da stad – Giubieum da 50 onns
Vendergis, ils 30 d’uost 2024 allas 20.30 uras
Sonda, ils 31 d’uost 2024 allas 20.30 uras
Dumengia, igl 1. da settember 2024 allas 11.00 uras
en baselgia a s. Rumetg
Gia dapi 50 onns ein ils concerts da stad a Falera enconuschents per la biala ed exquisita musica da combra. Mintg’onn ein quels treis concerts in punct fix el program cultural dalla regiun. Sper ils grondius artists e la cuntrada da siemi, dat era la biala baselgia da s. Rumetg als concerts in caracter particular.
Il vendergis udis vus igl „Amar Quartett”, ensemen cun Hannes Bärtschi alla viola, cun ovras da W. A. Mozart e P. Hindemith, igl emprestanum dil quartet.
La sonda surprendin nus vus cun ovras d’in quartet d’instruments ad artg e bandoneon, ina formaziun nunusitada. Luciano Jungman suna il bandoneon. Sil program statan ovras da W. A. Mozart, A. Dvorak ed era tangos dad A. Piazzolla.
La dumengia delectescha igl „Amar Quartett” vus cun in quartet d’instruments ad artg da F. Busoni ed in quintet d’instruments ad artg per dus violoncellis da J. Brahms.
Informaziuns detagliadas anfleis vus sut:
www.sommerkonzertefalera.ch.
Survetsch divin preeucaristic pils affons
Dumengia, ils 15 da settember 2024 allas 09.30 uras
Cun plascher envidein nus vus, cars affons, al survetsch divin preeucaristic dalla dumengia da Rogaziun federala. Da cuminonza engraziein nus a Diu, nies Bab, il Scaffider per tut quei che crescha e verdeghescha ella natira.
Nus selegrein sin quella sentupada e sperein che
biars affons prendien part a nies survetsch divin.
Eveline e Lenita
S. Messa da laud
Dumengia, ils 22 da settember 2024 allas 18.30 uras a Laax
cun sur Pius Betschart da Flem
Cordial invit a nossa messa da laud cun musica nova, moderna e spirituala e cun ina liturgia ed oraziuns per part cumpletadas cun acustica, graficas ni elements visuals.
L’unfrenda va en favur dalla fundaziun „Mbara Ozioma”.
Per passentar ina cuminonza viventa e cartenta ein tuts envidai suenter il survetsch divin tier in refrestg ella Sentupada.
Nus selegrein sin in bien seveser cun vus.