Nova Sentupada
Ella Sentupada sper la Casa pervenda han liug differentas radunonzas, las emprovas da cant da nos chors sco era differentas occurrenzas da nossa pleiv. La Sentupada sa denton era vegnir affitada da glieud indigena e d’ordeifer, firmas e societads per cuors, scolaziuns, trenaments ni fiastas.
La Sentupada vegn purtada cumineivlamein dalla pleiv e dalla Fundaziun Pro Laax.
Nus essan alla tscherca d’ideas:
Formaziun dalla plazza Nova Sentupada
Cun reconstruir la Nova Sentupada a Laax dat ei era ina nova plazza avon il baghetg. Quei liug da s’entupar niev per la populaziun duei survegnir in aspect special – in mosaic cun crappa da sulada. Il motiv leutier encurin nus uss cun ina concurrenza d’ideas publica.
Gidei da concepir quel!
Il davos termin d’inoltrar propostas ei ils 30 da zercladur 2026.
In niev center da s’entupar per Laax e sia populaziun
La stad 2026 entscheivan las lavurs da construcziun per la Nova Sentupada sut la baselgia parochiala. Il baghetg d’occurrenzas modern duei daventar in liug dallas sentupadas, dil brat e dall’inspiraziun. In liug nua che carstgauns da tuttas generaziuns s’entaupan e nua ch’els han caschun da tgirar ils ligioms socials e rinforzar la convivenza el vitg.
Dalla Nova Sentupada dat en egl sia fuorma rodunda, il baghetg da lenn harmonisescha optimalmein culla topografia dil crest-baselgia. Il medem mument sesarva ina plazza ella fuorma d’ina cuort, naven da leu entran ins directamein ella gronda sala principala.
La concurrenza ei instradada
La plazza avon la Nova Sentupada ei ina part essenziala dil baghetg. Pertgei leu entscheiva la glieud a tschintschar e seconversar. Era ord vesta concepziunala duei quell’impurtonza, sco liug che colligia tuttas generaziuns, semussar. Concret vul quei gir il suandont: In grond mosaic da sulada duei vitalisar la plazza ed envidar da scuvierer ed explorar. Da maniera simpatica duei quei element inspirar, manifestar ed exprimer la populaziun che viva oz a Laax. La Nova Sentupada ei cheu pils da Laax – e perquei han lezs era la pusseivladad da contribuir al concept dil mosaic da sulada. Quei vul gir che nus encurin il sujet da quei simbol, e quei cun ina concurrenza d’ideas publica. Tuts astgan separticipar: Giuven e vegl, hosps ed indigens, concepiders laics ed artist:as professiunal:as. Il principal ei che tuts setegnan vid las directivas.
Premiaziun al marcau dil vitg
Il davos termin d’inoltrar la proposta ei ils 30 da zercladur 2026. Ina giuria fa silsuenter ina preselecziun da treis tochen tschun motivs, lezs vegnan presentai al marcau dil vitg dils 25 da fenadur 2026. Leu sa la populaziun votar e decider il motiv che gudogna la concurrenza.
Plinavon san ins cumprar al marcau dil vitg crappa da sulada speciala e cunquei sustener da maniera activa e persunala il project cumineivel. El motiv eis ei previu d’integrar, tenor pusseivladad, quels «craps da fauturs». Suenter la premiaziun dils megliers motivs suondan detagls en gliez connex.
Directivas pil concept dalla plazza
- Ord vesta tematica sto il motiv s’accordar culla Nova Sentupada. El duei exprimer
noziuns sco «cuminonza», «setener ensemen», «carezia proximala», «generaziuns»,
«convivenza», «s’entupar» eav. - Ord vesta dalla formaziun sto il motiv s’adattar agl entir concept architectonic e
risguardar il lungatg dallas fuormas dil crest-baselgia (dapli informaziuns anfl’ins ella
descripziun dil project. - Il maletg total duei sepresentar harmonicamein e ruasseivel.
- Treis tuns da colur ein a disposiziun: crappa grischa, stgira e clara.
- Il motiv (resp. ils motivs) sa/san s’extender sur l’entira plazza ni selimitar sil sectur avon
la sala principala. - Sche l’entira plazza vegn integrada el concept, resta la formaziun limitada sin sempels ornaments e musters. La gronda part dalla surfatscha sto lu esser en crap grisch.
- Il sectur predefiniu avon la sala principala (ca. 25m²) san ins concepir libramein. La sulada dall’ulteriura plazza en artg vegn adattada al motiv.
- Ins sa era cumbinar omisduas variantas.
- Ils elements dil contuorn (plonta cun baun, fontauna) san ins includer el motiv.
Illustraziun/maletg
Ils motivs d’ideas ein d’illustrar sin in plan dil contuorn e/ni sin in plan detagliau. Fegls da presentaziun (format A3) san ins scargar sin quella pagina ni retrer digl Uffecida baghegiar Laax.
Presentaziun 1 (entira plazza)
Scargar sco pdf
Inoltrar
Las ideas pil(s) motiv(s) ein d’inoltrar sin pupi e sils fegls da presentaziun – cun indicar silla vart davos las coordinatas da contact (num e prenum, adressa, e-mail, numera da telefon).
Inoltrar tochen ils 30 da zercladur 2026 a:
Pleiv roman-catolica Laax
Via Principala 39
7031 Laax.
Sche Vus haveis damondas, s’annunziei p. pl. tier Christoph Kälin,
079 408 33 08 | president@pleiv-laax.ch.
Cordial engraziament per Vossa participaziun e per Vossas ideas creativas!
Pleiv roman-catolica Laax Fundaziun Pro Laax Vischnaunca politica Laax
President: President: Menadra uffeci da baghegiar
Christoph Kälin Toni Camathias Simona Camathias
Vossa persuna da contact
Christoph Kälin
President
Muort las lavurs da construcziun dalla nova Sentupada stat la Sentupada veglia buc a disposiziun naven da l’entschatta uost 2026 tochen ca. primavera 2028.
La vischnaunca da Laax metta a disposziun infrastructura d’affittar per exempel el baghetg multifuncziunal “Spazi” ni ell’aula dalla casa da scola Grava.