Construcziun Nova Sentupada
Ella Sentupada Laax han buca mo liug occurrenzas dalla pleiv, cheu s’entaupan era las uniuns dil vitg, ils giuvenils ed ils pli vegls – seigi ei per emprovas da cant, eveniments ni era per star da cumpignia e dar ina paterlada. Ultra da quei san las localitads vegnir reservadas per fiastas da famiglia, seminaris, workshops ed aunc bia dapli.
In liug da sentupada per tut quels da Laax
Cunquei ch’il baghetg existent ei vegnius empau els onns ha la pleiv sco possessura decidiu, da baghegiar in niev center da sentupada: la Nova Sentupada. Las lavurs da construcziun entscheivan la stad 2026. Il project vegn purtaus cumineivlamein dalla Pleiv roman-catolica Laax, dalla vischnaunca politica Laax e dalla Fundaziun Pro Laax.
In niev plaz el vegl center dil vitg
Igl element central dalla Nova Sentupada ei la plazza avon il baghetg che secoligia senza interrupziun cun la sala principala e che sa aschia vegnir duvrada a moda fetg varionta. In grond mosaic da crappa duei mussar sia impurtonza sco liug da sentupada e da cuminonza. Il motiv leutier encurin nus cun ina concurrenza d’ideas.
Modern sin treis alzadas
Il baghetg da lenn ch’ei lev sturschius s’integrescha a moda harmonica el biet dalla baselgia e dat aschia in accent modern, senza concurrenzar cun la baselgia sezza. Ell’alzada sut sesanfla la sala pintga e la stanza da giuvenils; el plaunterren la sala principala che sesarva sc’in pavigliun encunter il plaz avon il baghetg, sco era la cuschina; ell’alzada su sesanflan duas stanzas da sesidas.
L’entschatta digl onn 2028 duei la Nova Sentupada vegnir inaugurada.
Vossa persuna da contact
Christoph Kälin
President
Muort las lavurs da construcziun dalla nova Sentupada stat la Sentupada veglia buc a disposiziun naven da l’entschatta uost 2026 tochen ca. primavera 2028.
La vischnaunca da Laax metta a disposziun infrastructura d’affittar per exempel el baghetg multifuncziunal “Spazi” ni ell’aula dalla casa da scola Grava.