Nova Sentupada

Cull’emprema badelada dad oz ha la fasa da baghegiar dalla Nova Sentupada a Laax entschiet. Sut la baselgia parochiala dat ei in center modern da s’entupar e per occurrenzas – cun ina plazza concepida specialmein. Sper la pleiv sco proprietaria separticipeschan al project era la vischnaunca politica Laax e la Fundaziun Pro Laax.

La Sentupada da Laax ei dapi varga 40 onns ina part fixa dalla veta sociala dil vitg. En quei baghetg ein buca mo las occurrenzas dalla pleiv catolica. Igl ei era in center dallas uniuns e dalla populaziun en general. Cheu s’entaupan giuven e vegl, seigi per exercezis da tut gener, per occurrenzas e sedutas, brats e reuniuns. Gruppas, uniuns, famiglias ed organisaziuns san reservar las localitads per fiastas, seminaris, luvratoris e bia auter.

La Sentupada d’entochen ussa era occupada ella media pli che 250 dis ad onn. Suenter quater decennis senteva la casa denton las grevezias dalla vegliadetgna ed ei fuss stau indispensabel da far ina sanaziun pli gronda. Perquei ei la Pleiv catolica da Laax sedecidida da baghegiar in niev center modern, multifuncziunal ed adattau allas pretensiuns dil temps: la Nova Sentupada. In ulteriur motiv d’in project niev ei che la vischnaunca ei sesviluppada ils davos 20 onns fermamein ed igl ei da spitgar ch’il diember da habitonts creschi vinavon.

Liug da s’entupar per tuttas e tuts da Laax
«La Nova Sentupada duei daventar in liug d’inscunters per tuttas e tuts da Laax – in center nua che las generaziuns san s’entupar e seschar inspirar vicendeivlamein», ha Christoph Kälin, il president dalla pleiv, declarau ils 6 d’uost 2026 a caschun dall’emprema badelada.

Il patratg dils contact socials semuossa gia cull’architectura attractiva. En direcziun dalla baselgia sepresenta la casa da lenn sco pavigliun sturschiu levamein. Encunter engiu fuorma il baghetg niev, ensemen culla baselgia da 350 onns ed il santeri, gl’ensemble dil crest baselgia.

Ell’alzada sut dalla Nova Sentupada sesanflan la sala pintga ed il local da giuventetgna. El plaunterren ei la sala principala culla cuschina per occurrenzas; la preits dalla sala ch’ein buca parallelas caschunan in’accustica ulivada el local. El plaun sura dil baghetg dat ei lu aunc duas stanzas da sesidas.

Il brat entscheiva avon casa
Per quei project dallas generaziuns a Laax ha la pleiv organisau ina concurrenza d’architects. Da sis lavurs inoltradas ha il project «Taro» dad Andreas Schneller gudignau. Gl’architect che lavura a Turitg e Schluein accentuescha sia idea suandontamein: «Il niev center da scuntrada ei da capir sco casa sil plaz. Demai che la sala principala selai arver generusamein, entra la plazza avon casa quasi egl intern e daventa ina unitad. Quei lubescha in diever multifar dalla Nova Sentupada».

La plazza da sulada che vegn scaffida denter baselgia e Sentupada ei ina part impurtonta dil project, «pertgei las sentupadas, il brat ed ils contacts entscheivan cheu – e buca pér endadens», declara Andreas Schneller. In grond mosaic da crappa da sulada duei mussar ed accentuar quella muntada sco liug dils inscunters. Il motiv corrispundent ei vegnius tscharnius cun ina concurrenza publica. Il project victur vegn communicaus pli tard.

La Fundaziun Pro Laax e la vischnaunca da Laax separticipeschan cun mintgamai in milliun francs vid il project Nova Sentupada. La pleiv catolica da Laax surpren, sco proprietaria, ina summa da treis milliuns francs. Culla spazzada dil baghetg vegl han las lavurs da construcziun entschiet, quellas vegnan a cuzzar biebein in onn e miez.