Devoziun ecumena pil “Gi mundial d’oraziun”

“Jeu vi rinforzar vus, vegni!”, sut quei motto lein era nus secolligiar a moda solidarica cun bia dunnas cristianas sigl entir mund per festivar ensemen il gi mundial d'oraziun.

Uonn envida il gi mundial d'oraziun svizzer tuttas e tuts da sustener las dunnas dalla Nigeria e da celebrar ina liturgia nigeriana. Musicalmein vegnin nus sustenidas da nos cresmands ensemen cun Heidi Casutt.

Lein seprofundar ella veta dallas dunnas nigerianas ed aschia survegnir in'investa ella veta da quellas dunnas. Lein urar, cantar e secolligiar cugl entir mund.

Suenter la devoziun envidein nus in e scadin cordialmein ad in aperitiv culinaric cun delicatessas africanas. Vus astgeis esser spannegiai.

Nus selegrein sin vossa participaziun,
la gruppa dil gi mundial d'oraziun Laax/Falera