Baselgia parochiala

kirche-laax-sommer-fpL’emprema baselgia vegn meziunada en in document da 1309. Tuttina ha Laax apparteniu alla pleiv da Sagogn tochen 1525.

Perquei che la glieud da Laax vuleva esser libra, quei vul dir independenta e decider sezza quei che duei succeder, specialmein cun in agen plevon, han els contonschiu igl onn 1525 digl uestg da Cuera il dretg da crear in’atgna pleiv. Essend ch’ei regeva da gliez temps ina gronda munconza da spirituals, ein varga 100 onns vargai, avon ch’igl emprem plevon ha priu domicil a Laax.

Da 1675 tochen 1678 han ils habitonts dil vitg construiu la baselgia barocca dad oz. Ella ei vegnida baghegiada precis el medem stil sco la baselgia da s. Placi a l’entrada dil vitg da Mustér. Perquei ch’ils libers da Laax sesentevan da gliez temps in tec dapli han els construiu lur baselgia per in miez meter pli liunga, pli lada e pli aulta che quella a Mustér.

Sur l’entrada dalla baselgia san ins leger: „In triennio totum hoc templum a communitate ex fundamento erectum est. Anno 1678” (En treis onns ei questa baselgia vegnida construida da funs ensi. Igl onn 1678).

Ils 17 d’october 1677 ha igl uestg da kirche-laax-innenCuera consecrau e dedicau la nova baselgia alla SS. Trinitad, a Nossaduna ed als patruns Gagl (641) ed Otmar (759) (representai egl altar grond).

 

 

Davart la baselgia respectiv davart la lavur ch’ei vegnida prestada vid e per quella baselgia stat ei scret el cudisch da LAAX:

„Possi nossa stentusa lavur esser per tschentaners ora perdetga d’in viv spért catolic en la pleiv da Laax. Nus tuts sefidein vinavon sigl agid da Diu e Nossadunna e da nos patruns-baselgia sogn Gagl e sogn Otmar”.