Caplutta da S. Bistgaun

Amiez igl uaul agl ur dalla via veglia viers Glion stat la caplutta da S. Bistgaun. Il sempel edifeci rectangular cun tetg da siala ed in arviul cruschau egl intern datescha d’entuorn igl onn 1520 ed ei bein vegnius construius en connex cun las grondas epidemias dalla pesta.

A quei fatg envieschan ils dus patruns dalla caplutta S. Bistgaun e S. Roc, ch’ein representai en la pictura al fresco en la nischa dil mir oriental. Quella pictura murala ei vegnida scuvretga entiramein a caschun dalla davosa restauraziun. Ella ei probablamein vegnida creada a caschun dalla renovaziun dalla caplutta ch’ei succedida gia 1640.

Sin fundament dils rests fragmentaris ei quei maletg vegnius surluvraus e cumplettaus per ina buna part.

Denter l’entschatta fenadur tochen miez uost celebrein nus en quella caplutta mintg’jamna in survetsch divin da luverdis.