Caplutta da Sontgaclau

La caplutta da Sontgaclau sesanfla agl ur dalla via a Flem directamein sur la Val Draus. Igl edifeci dad oz datescha digl onn 1846. L’anteriura caplutta ha stuiu untgir alla slargada dalla via cantunala. Aunc adina muossa il crap cun l’inscripziun “ian cla pitzen 1503”, ch’ei steva cheu gia fetg baul silmeins in sontget. Forsa ha il numnau Pittschen regalau quel en engrazieivladad viers la vischnaunca, che haveva schau ereger el la caplutta da S. Giacun.

En mintga cass sesanflava el medem liug gia entuorn 1600 ina caplutta dedicada a Sontgaclau. Quei cumprova ina tabla votiva dil capitani Montalta, postada sur l’entrada. Sin quella stat ei scret che siu fegl da tschun onns seigi curdaus ils 15 da settember 1624 en la val profunda senza vegnir vulneraus.

Egl intern dalla pintga caplutta cun arviul ed ina apsida en fuorma da miez rudi sesanfla in altar enramaus da duas colonnas cun il maletg da S. Nicolaus.

En l’jamna dils 6 da december, il gi da Sontgaclau, celebrein nus cheu ina S. Messa.