Caplutta da bara

Gest sper la baselgia parochiala stat il vegl carner che nus duvrein oz sco caplutta da bara. Ton a sia fatschada sco era en siu intern sesanflan monuments da fossas cun ils nums d’impurtontas famiglias da Laax: Cabalzar, Coray, Toggenburg.

Ultra da quei cuntegn igl edifeci in maletg d’altar dil 17. tschentaner che representa ina pietà cun las figuras assistentas en costums nobels e curtisans e cun vesta sin ina cuntrada citadina da gronda fantasia. Probablamein setracta ei d’in maletg che sesanflava pli baul en la baselgia menziunada igl onn 1309, pertgei il tema ni il motiv dil maletg e la processiun da figuras agl ur seniester dil maletg astgan senz’auter vegnir attribui all’anteriura confraternitad dil num da Jesus.