Baselgia parochiala

Nossa baselgia parochiala ei dedicada al SS. Cor da Jesus. La fiasta da dedicaziun baselgia, la perdanonza, festivein nus cun processiun e viaspras la dumengia dil S. Rusari, l’emprema dumengia d’october.

2004 havein nus festivau il 100avel onn da sia existenza. Ella ei vegnida baghegiada perquei ch’il giavisch d’haver ina baselgia ni caplutta el center dil vitg vegneva adina pli e pli ferms. Per glieud attempada era ei quasi nunpusseivel da frequentar ils survetschs divins a S. Rumetg duront igl unviern cun scheltiras e nevadas. Ils 24 da matg 1903 ei il crap da fundament vegnius tschentaus. Malgrad che tuttas lavurs eran aunc buca finidas, ei la baselgia stada a disposiziun alla pleiv naven dils 11 da fenadur 1904.

Igl onn 1968 ei la baselgia vegnida renovada totalmein en connex cun las novaziuns liturgicas dil Secund concil vatican.

Las finiastras el chor, creadas igl onn 1989, muossan la construcziun dalla tuor da Babel ed igl eveniment da Tschuncheismas. Ellas effectueschan da sulegl ina atmosfera speciala el chor.